Një aksident tragjik ka ndodhur në zonën Gorau të shtetit Sokoto, në veriperëndim të Nigerisë, ku një varkë e mbingarkuar është përmbysur gjatë transportit të pasagjerëve. Mjeti lundrues ishte duke kaluar një përrua në orët e mëngjesit për të dërguar fermerë, familje dhe punëtorë drejt fushave të orizit për punë bujqësore.
Sipas Abdulkadir Yusuf, zyrtar lokal i Autoritetit të Navigimit të Brendshëm, deri më tani janë nxjerrë nga uji trupat e rreth 40 fëmijëve. Shqetësuese është fakti se shumica e personave në bord ishin fëmijë të moshës midis 10 dhe 15 vjeç. Burimet lokale raportojnë se në varkë ndodheshin më shumë se 70 pasagjerë dhe përmbysja ndodhi menjëherë pas nisjes.
Gazetari vendas Sarhambilou Yahouza Kilia, i cili ndodhej në vendngjarje, konfirmoi se deri tani janë shpëtuar 6 persona, mes të cilëve edhe kryetari i fshatit. Autoritetet lokale, përfshirë drejtuesin e zonës Sarkin Daji, kanë njoftuar se operacionet e kërkimit vijojnë me intensitet nga zhytësit dhe banorët e zonës, pasi ekziston frika se numri i viktimave mund të rritet. Ky aksident pasqyron pasigurinë e mjeteve lundruese në këtë rajon, ku mbingarkesa është një dukuri e shpeshtë, siç ndodhi edhe në muajin janar në shtetin Yobe, ku humbën jetën 25 persona.
Përditësime
Autoritetet lokale konfirmuan rritjen e numrit të viktimave në 50 persona, nga 40 të raportuar më parë. Ngjarja ndodhi pranë Gorau, në zonën e qeverisjes vendore Goronyo. Dëshmitarët okularë raportuan se trupat e viktimave janë vendosur në një xhami komunitare për t'iu nënshtruar riteve të varrimit.