Trajneri Edlir Tetova konfirmoi largimin e tij nga KF Egnatia në fund të këtij sezoni gjatë një konference për shtyp të mbajtur në stadiumin Arena Egnatia në Rrogozhinë. Ai shpjegoi se vendimi është personal dhe e ka diskutuar me presidentin e klubit Demrozi, i cili e ka pranuar dorëheqjen. Bashkëpunimi do të vazhdojë deri në përfundim të kampionatit, duke përfshirë sfidat e Final 4, ku ekipi synon të fitojë titullin.
KF Egnatia bëri të ditur se palët kanë rënë dakord për vazhdimësi deri në fund të sezonit, me fokus te arritja e objektivave. Klubi kishte paralajmëruar konferencën një ditë më parë, në kontekst të zhvillimeve disiplinore, përfshirë dënimin me 6 muaj të trajnerit Tetova nga Komisioni i Disiplinës i FSHF, që e pengon atë të drejtojë ndeshjet.
Gjatë mandatit të tij, Tetova ka drejtuar Egnatian në 156 ndeshje me 74 fitore, 43 barazime dhe 39 humbje. Ai ka fituar pesë trofe: dy kampionate shqiptare, dy Kupa të Shqipërisë dhe një Superkupë. Tetova u ul për herë të parë në stol për tre muaj në vitin 2022, u rikthye si drejtor sportiv në fillim të 2023-s dhe u emërua trajner më 27 janar të po atij viti.
Sipas burimeve nga RTSH Sport, trajneri 43-vjeçar durrsak mund të rikthehet në vendlindje dhe të marrë drejtimin e Teutës nga sezoni i ardhshëm, por Tetova nuk e konfirmoi këtë në konferencë, duke thënë se presidenti Demrozi do të zgjedhë pasardhësin.