Drejtoria e Përgjithshme e Burgjeve ka njoftuar se ka kryer transferimin e të dënuarit me burgim të përjetshëm Miklovan Parubi nga IEVP Peqin në IEVP Burrel për arsye sigurie.
Transferimi u bë me urdhër të Drejtorit të Përgjithshëm Adriatik Kupi, bazuar në informacione paraprake operative nga strukturat e Shërbimit të Kontrollit të Brendshëm në Sistemin e Burgjeve (ShKBB).
Gjatë kontrollit të imtë në momentin e pranimit në IEVP Burrel, në materialet personale të Parubit u gjet e fshehur në një çorape një qese e vogël e dyshuar si lëndë narkotike.
Menjëherë u njoftuan drejtuesit e institucionit, ShKBB si dhe Komisariati i Policisë Burrel, i cili mori në dorëzim materialin për kryerjen e ekspertizës përkatëse.
Ngjarja po ndiqet sipas procedurave ligjore në fuqi. Drejtoria e Përgjithshme e Burgjeve mbetet e angazhuar në një luftë pa kompromis ndaj çdo paligjshmërie brenda institucioneve të vuajtjes së dënimit.