Drejtoria e Përgjithshme e Burgjeve njoftoi se ka ndërmarrë masa të shtuara për parandalimin e futjes së sendeve të ndaluara në institucionet e ekzekutimit të vendimeve penale, duke aplikuar politikën e tolerancës zero.
Në IEVP Durrës, një punonjës i Polisë së Burgjeve u kap në flagrancë duke tentuar t’i kalonte një të paraburgosuri lëndë të dyshuar narkotike. Rasti u zbulua falë analizës së riskut dhe bashkëpunimit me Agjencinë e Mbikëqyrjes në Sistemin e Ekzekutimit të Vendimeve Penale. Pas ndalimit, punonjësi u pezullua menjëherë nga detyra, ndërsa gjatë kontrollit fizik iu gjet një sasi tjetër e dyshuar si lëndë narkotike.
Ndërkohë, në Burgun e Fierit, gjatë kontrolleve të ushtruara në ambientet e paraburgimit, u gjetën dhe u sekuestruan dy telefona celularë dhe një fishë karikimi. Autorët e futjes së këtyre sendeve në institucion ende nuk janë identifikuar.
Institucionet përgjegjëse po vijojnë veprimet procedurale dhe hetimore për zbardhjen e plotë të të dyja rasteve.