Drejtoria e Përgjithshme e Burgjeve zhvilloi një kontroll të befasishëm në IEVP Shkodër, në vijim të masave për rritjen e sigurisë në institucionet penitenciare. Kontrolli u krye në zbatim të Urdhrit Nr. 626, datë 7 prill 2026, të Drejtorit të Përgjithshëm Adriatik Kupi dhe nën drejtimin e Drejtorit të Policisë së Burgjeve, Drejtues i Lartë Paulin Rajta. Forcat Operacionale dhe Forcat Speciale verifikuan 38 dhoma banimi dhe ambientet e përbashkëta për sende të ndaluara.
Në dhomën nr. 9, Godina 1, që i përket të dënuarve me iniciale R.M. dhe E.H., u konstatua një cigare e dëmtuar, e hedhur në lavaman dhe e dyshuar si lëndë narkotike. Të dënuarit u veçuan menjëherë, u hartua raport incidenti dhe u njoftuan strukturat përkatëse, përfshirë Shërbimin e Kontrollit të Brendshëm në Sistemin e Burgjeve, për vijimin e procedurave.
Gjatë kontrollit u nxorën sende të tepërta dhe u rikontrolluan 2 televizorë. Gjithashtu, u konstatuan dhe sekuestruan objekte të tjera të ndaluara. Drejtoria e Përgjithshme e Burgjeve njofton se kontrollet e befasishme do të vazhdojnë në të gjitha institucionet penitenciare për të garantuar rendin dhe sigurinë.