Mëngjesin e kësaj të diele u zhvilluan kontrolle të befasishme në IEVP Lushnjë dhe IEVP Elbasan. Operacioni u krye me urdhër dhe nën drejtimin e Drejtorit të Përgjithshëm të Burgjeve Adriatik Kupi dhe Drejtorit të Policisë së Burgjeve, Drejtues i Lartë Paulin Rajta.
Kontrolli përfshiu qelitë, regjimet e brendshme, ambientet e përbashkëta dhe sektorët e sigurisë, me qëllim evidentimin e sendeve të ndaluara dhe forcimin e masave të sigurisë.
Në IEVP Elbasan operacioni u zhvillua në bashkëpunim me drejtorin e ri të institucionit, në kuadër të marrjes së detyrës. Në IEVP Lushnjë u angazhuan forca të shumta të sigurisë dhe personel i administratës së burgjeve.
Gjatë kontrolleve u konstatuan dhe u sekuestruan sende të tepërta, konzola lojërash PS4, pajisje USB, aksesorë telefonash dhe mjete të tjera komunikimi. Çdo material që dyshohet se përbën vepër penale do t’i referohet SHKBB-së dhe organeve kompetente për hetime të mëtejshme.
Autoritetet njoftojnë se kontrolle të ngjashme do të vazhdojnë edhe në institucione të tjera të vendit.