Drejtoria e Përgjithshme e Burgjeve zhvilloi një kontroll të befasishëm në IEVP Durrës, në orët e para të mëngjesit të 1 majit 2026. Aksioni u ndërmor në bazë të informacioneve operative dhe analizës së riskut, në zbatim të Urdhrit nr. 626, datë 7 prill 2026, me pjesëmarrjen e Forcave Speciale të DPB.
Gjatë kontrollit në ambientet e brendshme dhe të jashtme u sekuestruan tre telefona tip iPhone, të ndezur dhe funksionalë. Njëri u gjet në posedhje të të paraburgosurit me iniciale B.G., ndërsa dy të tjerë, së bashku me një palë kufje bluetooth, u konstatuan pa autor në ambientet e institucionit.
Menjëherë u veçua i paraburgosuri B.G., u hartua raporti i incidentit dhe u mbajt procesverbali i bllokimit të sendeve. Materialet iu referuan Specialistit të SHKB-së për veprime hetimore të mëtejshme.
Drejtoria e Burgjeve thekson vendosmërinë për të goditur çdo tentativë për cenimin e sigurisë dhe paralajmëron kontrolle me intensitet të lartë në të gjitha IEVP-të, me zero tolerancë ndaj shkeljeve.
Ngjarje e ngjashme në IEVP Fushë Krujë
Në IEVP Fushë Krujë, më 30 prill 2026, gjatë kontrollit rutinë ndaj familjarëve, u evidentua tentativë për futjen e një telefoni iPhone nga shtetaseja S.S., e fshehur në çantën e ushqimeve për bashkëshortin e saj të paraburgosur. Takimi u pezullua, sendi u sekuestrua dhe u njoftua SHKB-ja, ndërsa u ushtruan kontrolle shtesë në ambientet e të paraburgosurit.