Forcat Speciale të Drejtorisë së Përgjithshme të Burgjeve, në bashkëpunim me Prokurorinë e Posaçme Kundër Korrupsionit dhe Krimit të Organizuar (SPAK) dhe Byronë Kombëtare të Hetimit (BKH), kanë kryer kontrolle të befasishme në Institutin e Ekzekutimit të Vendimeve Penale (IEVP) Durrës.
Gjatë kontrollit në godinën B, u konstatua dhe sekuestrua një aparat celular tip iPhone, së bashku me karikues dhe fishë lidhëse të improvizuara. Sipas disa burimeve, celular dyshohet se i përket të dënuarit Artur Hoxhosmani.
Artur Hoxhosmani dhe vëllai Klevis Hoxhosmani, së bashku me Ermir Ndrejaj dhe Plarent Dervishaj, akuzohen për trafikimin e 6 ton kokainë me vlerë 411 milionë euro. Grupi u godit nga SPAK në korrik, kur u arrestuan 6 persona, ndërsa 7 të tjerë u shpallën në kërkim. Aktiviteti i tyre është dokumentuar kryesisht në vitin 2020, me tonelata droge nga Ekuadori drejt vendeve të Bashkimit Evropian.
Lidhur me rastin e celularit, janë kryer veprimet procedurale përkatëse dhe është mbajtur procesverbal për bllokimin dhe sekuestrimin e sendeve të ndaluara. Strukturat e specializuara të Shërbimit të Kontrollit të Brendshëm në Burgje (SHKBB), në koordinim me SPAK dhe BKH, po vijojnë hetimet për zbardhjen e rrethanave dhe përcaktimin e përgjegjësive.
Drejtoria e Përgjithshme e Burgjeve thekson angazhimin për forcimin e sigurisë në institucionet penitenciare dhe goditjen e çdo paligjshmërie brenda sistemit.