Drejtoria e Përgjithshme e Burgjeve ka ushtruar kontrolle në institucionet e ekzekutimit të vendimeve penale në Shkodër, Durrës dhe Peqin për parandalimin e futjes dhe mbajtjes së sendeve të ndaluara.
Në IEVP Shkodër kontrollet janë kryer në dhomat e banimit dhe ambientet e përbashkëta. Gjatë kontrollit fizik të të paraburgosurit me iniciale G.Z. është gjetur dhe sekuestruar një celular i tipit iPhone bashkë me karikuesin. Në ambientet e përbashkëta janë sekuestruar edhe dy celularë të tjerë të tipit iPhone.
Në IEVP Durrës kontrollet janë zhvilluar në godinën A. Është gjetur një celular iPhone ngjyrë e zezë poshtë jastëkut të të paraburgosurit E.C., i cili ka pranuar pronësinë e tij. Në të njëjtën godinë janë sekuestruar edhe dy pajisje USB.
Në IEVP Peqin kontrollet janë ushtruar në ambientet e dusheve, ku janë gjetur dhe sekuestruar dy celularë: një Samsung ngjyrë e bardhë dhe një Redmi ngjyrë e zezë.
Për të gjitha rastet janë hartuar procesverbalet përkatëse dhe materialet procedurale janë referuar për veprime të mëtejshme në përputhje me legjislacionin në fuqi.
Përditësime
Policia e Shtetit identifikoi Gjergj Zefin (G.Z.) gjatë kontrolleve në burgjet e Shkodrës, Durrësit dhe Peqinit, ku u sekuestruan celularë dhe USB. Midis të burgosurve të tjerë figurojnë Naim Behluli (operacioni “Ura”), Gëzim Allci (vrasjet e Manzës, tetor 2025), Ermal Ceni (tentativë vrasjeje në Durrës) dhe Murat Çerriku (kërcënim me armë zjarri).
Autoritetet kryen një kontroll të ri në IEVP Fier, ku sekuestruan një celular iPhone nga i dënuari L.K., i cili u dërgua në veçim.