Gjatë kontrolleve të ushtruara nga AMSEVP, në bashkëpunim me Drejtorinë e Përgjithshme të Burgjeve, janë konstatuar celularë dhe sende të ndaluara në tri institucione të ekzekutimit të vendimeve penale (IEVP).
Në burgun e Peqinit, gjatë kontrollit të sendeve personale, u gjet një celular te i burgosuri F. Ç., i cili u arrestua në flagrancë. Për të njëjtin rast, u proceduan në gjendje të lirë katër të burgosur (M. H., L. Gj., I. L. dhe F. A.) për moskallëzim krimi, si dhe dy punonjës policie (Sh. K. dhe E. J.) për shpërdorim detyre.
Në burgun e Fierit, në dhomën e të burgosurit R. K. u gjet një tjetër celular. I dënuari R. K. dhe i burgosuri E. B. u proceduan në gjendje të lirë përkatësisht për mbajtje të sendeve të ndaluara dhe moskallëzim krimi.
Në burgun e Durrësit, në datën 16 shtator 2026, u sekuestruan një celular dhe një karikues në dhomën ku akomodoheshin të burgosurit N. K., P. M. dhe E. H. Pas kësaj, P. M. u arrestua në flagrancë, ndërsa N. K. dhe E. H. u proceduan në gjendje të lirë. Gjithashtu, për shpërdorim detyre u proceduan katër punonjës policie: A. S., A. C., S. M. dhe I. S.
Materialet procedurale i janë referuar Prokurorive pranë Gjykatave të Shkallës së Parë të Juridiksionit të Përgjithshëm në Elbasan, Fier dhe Durrës.
Përditësime
Autoritetet kanë identifikuar të burgosurin e arrestuar në burgun e Peqinit si Florian Çepa. Ai ishte dënuar më parë për vjedhje dhe për prodhim e shitje të lëndëve narkotike.