Riviera Shqiptare po tërheq vëmendjen e mediave ndërkombëtare të turizmit. Revista amerikane Travel + Leisure ka publikuar një artikull të Ada Calhoun, e cila e përshkruan bregdetin shqiptar si një nga destinacionet më të bukura dhe ende të pazbuluara të Evropës.
Autorja e cilëson Rivierën Shqiptare si alternativë të përballueshme ndaj Côte d’Azur në Francë. Ajo vlerëson plazhet me ujëra të kthjellëta, fshatrat prej guri dhe trashëgiminë historike të zonës.
Gjatë një udhëtimi njëjavor në Himarë, Calhoun u impresionua nga peizazhet natyrore, mikpritja shqiptare dhe qetësia jashtë sezonit turistik. Ajo përshkruan plazhin e Livadhit me guralecë të bardhë, ujëra kristal dhe kodra të mbuluara me ullinj.
Në artikull përmendet rruga panoramike përmes Qafës së Llogorasë, e cilësuar si spektakolare me pamje drejt Detit Jon dhe pyjeve me pisha. Gjatë qëndrimit në Himarën e Vjetër, autorja eksploroi rrënoja antike dhe kisha historike, si Kishën e Shën Sergjit dhe Shën Bakut.
Ajo vizitoi restorante familjare, ku provoi gatime si djathi i skuqur me mjaltë, peshku i freskët dhe rakia tradicionale. Një ndalesë e veçantë ishte Qeparoi i Sipërm, fshat me shtëpi guri dhe rrugica të ngushta që ruan atmosferën autentike.
Artikulli evidenton përpjekjet për restaurimin e banesave tradicionale dhe kthimin e tyre në bujtina turistike. Në fokus vendoset Butrinti, qyteti antik i mbrojtur nga UNESCO, i njohur për trashëgiminë greke, romake, bizantine dhe veneciane.
Përveç natyrës dhe historisë, theksohen kostot relativisht të ulëta të pushimeve në Shqipëri krahasuar me destinacionet e tjera mesdhetare.