Tre zyrtarë policorë u lënduan më 4 nëntor 2026, rreth orës 13:50, gjatë ndërhyrjes për të parandaluar një përleshje mes tifozëve të Prishtinës dhe Dritës, jashtë stadiumit në Gjilan. Në stadium po zhvillohej ndeshja mes dy skuadrave, në kuadër të Superligës së Kosovës.
Sipas zëdhënësit të Policisë për rajonin e Gjilanit, Valon Osmani, tifozët e të dyja ekipeve tentuan të përleshen fizikisht dhe njësitë policore ndërhynë për të parandaluar përshkallëzimin e situatës. Tre policët kërkuan ndihmë mjekësore në Qendrën Emergjente në Gjilan. Sipas raportit mjekësor, ata pësuan lëndime të lehta trupore.
Njësiti i Hetimeve i Stacionit Policor në Gjilan, në koordinim me Prokurorin e Shtetit, po ndërmerr veprime hetimore për të sqaruar rrethanat e rastit.
Ndeshja mes Dritës dhe Prishtinës përfundoi me fitoren 2-1 të Prishtinës. Blend Baftiu dhe Ardrian Hasani shënuan golat e skuadrës fituese, e cila mori tri pikë dhe u ngjit në krye të tabelës së Superligës, sipas Telegrafit dhe Albeut. Koha.net raporton se ndeshja ishte e mbetur e xhiros së dytë dhe u zhvillua në fushën me bar sintetik në Gjilan.