Shpërthim i një veture në Gjilan, dy persona të lënduar

Mbrëmjen e së mërkurës, rreth orës 21:45, në rrugën “Lufta e Gjilanit 44” në Gjilan, ka ndodhur një shpërthim në një automjet, i cili dyshohet se është shkaktuar nga një mjet shpërthyes. Në momentin e ngjarjes, në veturë ndodheshin dy persona, të cilët kanë pësuar lëndime trupore. Zëdhënësi i Policisë së Kosovës për rajonin e Gjilanit, Ismet Hashani, ka konfirmuar se vozitësi, i identifikuar si Nehat Thaqi, është dërguar me urgjencë për trajtim mjekësor në Qendrën Klinike Universitare të Kosovës (QKUK) për shkak të plagëve të rënda, ndërsa pasagjerja Ana Bojçiq është ndalur për trajtim të mëtejshëm mjekësor. Sipas raporteve, zjarrfikësit kanë ndërhyrë për të nxjerrë Nehat Thaqin nga automjeti i përfshirë nga zjarri, pasi ai kishte mbetur i bllokuar brenda. Në vendin e ngjarjes kanë dalë njësitë përkatëse policore, forenzika rajonale, si dhe prokurori kujdestar i shtetit. Për shkak të dyshimeve se në automjet ishte vendosur materie shpërthyese, është angazhuar edhe Njësia për Deminim dhe Eksploziv. Ekzaminimi i detajuar i vendit të ngjarjes ka vazhduar në orët e mëngjesit të së enjtes për shkak të kushteve të papërshtatshme gjatë natës. Deri në këtë fazë të hetimeve, motivet e ngjarjes mbeten të paqarta dhe nuk ka persona të identifikuar si të dyshuar. Rasti është iniciuar nga prokuroria si “Shkaktim i rrezikut të përgjithshëm”.