Një incident i rëndë ka ndodhur gjatë mbrëmjes së sotme në qytetin e Gjilanit, ku një veturë ka shpërthyer në rrethana që mbeten për t'u zbardhur nga autoritetet. Nga ky shpërthim, një person ka marrë lëndime të rënda dhe është transportuar për trajtim të specializuar në Spitalin e Përgjithshëm të Gjilanit, ku raportohet se ndodhet në gjendje të rëndë shëndetësore.
Në vendin e ngjarjes kanë mbërritur menjëherë njësitë e Policsë së Kosovës dhe ekipet e zjarrfikësve për të siguruar zonën dhe për të kryer veprimet e para hetimore. Ndonëse janë publikuar pamje nga vendngjarja, deri në këto momente nuk ka një njoftim zyrtar nga policia lidhur me shkaqet ose rrethanat specifike që çuan në këtë incident. Autoritetet pritet të ofrojnë detaje shtesë pas përfundimit të hetimeve paraprake dhe veprimeve në terren.
Përditësime
Zëdhënësi i Policisë së Kosovës, Ismet Hashani, konfirmoi se shpërthimi i një veture më 5 gusht 2026, rreth orës 21:45, në rrugën 'Lufta e Gjilanit 44', dyshohet të jetë shkaktuar nga një mjet shpërthyes. Si pasojë, shoferi ndodhet në gjendje të rëndë shëndetësore, ndërsa një pasagjere ka pësuar lëndime të lehta. Prokurori kujdestar ka dalë në vendin e ngjarjes për të mbikëqyrur hetimet.
Policia e Kosovës ka identifikuar personat e përfshirë në shpërthimin e mbrëmshëm në Gjilan. Bëhet fjalë për drejtuesin e automjetit, N.H. (40 vjeç), dhe pasagjeren J.I. (24 vjeçe).
Drejtuesi i automjetit, N.H. (40-vjeçar), është transferuar nga Spitali i Përgjithshëm i Gjilanit për trajtim të mëtejshëm në Qendrën Klinike Universitare të Kosovës (QKUK) për shkak të gjendjes së rënduar shëndetësore. Ndërkohë, Policia e Kosovës ka nisur hetimet për identifikimin dhe kapjen e autorëve të shpërthimit.
Policia e Kosovës e ka klasifikuar zyrtarisht rastin si 'shkaktim i rrezikut të përgjithshëm'. Hetuesit kanë njoftuar se pasagjerja J.I. (24-vjeçe) ka pësuar lëndime të rënda trupore, duke përditësuar raportimin e mëparshëm për lëndime të lehta. Të dy personat e lënduar janë duke marrë trajtim mjekësor të specializuar.