Të paktën tetë persona humbën jetën dhe 32 të tjerë u plagosën pas një aksidenti në një kalim hekurudhor në Bangkok të Tajlandës. Një tren mallrash që transportonte kontejnerë u përplas me një autobus pasagjerësh.
Sipas autoriteteve, autobusi ishte ndaluar mbi shinat në semaforin e kuq dhe kishte penguar mbylljen e barrierave. Treni nuk arriti të ndalonte në kohë dhe goditi autobusin, duke shkaktuar një zjarr që përfshiu automjetin dhe disa makina e motoçikleta pranë stacionit Makkasan të Airport Rail Link.
Zjarrfikësit dhe ekipet e shpëtimit arritën menjëherë në vendngjarje. Ata shuan flakët dhe nxorën të plagosurit nga rrënojat. Zjarri u vu nën kontroll dhe autoritetet kanë nisur hetimin për të sqaruar shkaqet e incidentit.
Organizata Botërore e Shëndetësisë rendit rrugët e Tajlandës ndër më të rrezikshmet në botë për shkak të zbatimit të dobët të rregullave të sigurisë.