Trepça Sh.A. ka nisur aksionin për lirimin e parcelës 02537-1 në Mitrovicë të Veriut, duke rrënuar të gjitha garazhet dhe objektet e ndërtuara pa bazë ligjore. Aksioni u zhvillua nën shoqërinë e policisë.
Sipas njoftimit zyrtar të Trepçës, zona përfshin mbi 20 garazhe dhe objekte të vendosura përgjatë rrugës, përballë burgut, të cilat ishin në pronësi të saj dhe u uzurpua në mënyrë të kundërligjshme. Ai u ndërmor pas skadimit të afatit 48-orësh për lirimin vullnetar dhe njoftimit të 13 shkurtit 2026, ku palëve u ofrua mundësia për të paraqitur marrëveshje eventuale për shqyrtim.
Operacioni zhvillohet me mbështetje institucionale dhe do të vazhdojë deri në rikthimin e plotë të pronës në menaxhimin e Trepça Sh.A.. Zëvendësdrejtori i Policisë së Kosovës për rajonin e veriut të Mitrovicës, Veton Elshani, konfirmoi për Telegrafin se policia ka asistuar në lirimin dhe rrënimin e garazheve pa probleme. “Kemi pranuar një kërkesë për asistencë nga Trepça për disa garazhe përballë burgut. Kemi ofruar asistencën tonë dhe nuk kemi hasur në ndonjë problem”, tha ai.
Përditësime
Trepça ka rrënuar 23 garazhe pa leje pranë qendrës së paraburgimit në Mitrovicë të Veriut, sipas të dhënave të reja.
Komuna e Mitrovicës së Veriut i bën thirrje komunitetit ndërkombëtar të reagojë, duke e cilësuar aksionin si ndërhyrje në kompetencat komunale nga autoritetet qendrore.