Presidenti amerikan Donald Trump deklaroi se një raund i ri bisedimesh me Iranin mund të zhvillohet brenda dy ditësh në Islamabad, Pakistan. Në intervista për New York Post dhe Fox Business, ai u shpreh optimist, duke thënë se "diçka mund të ndodhë gjatë dy ditëve të ardhshme" dhe se lufta është "shumë pranë përfundimit". Trump vlerësoi rolin e shefit të ushtrisë pakistaneze Asim Munir, duke e quajtur atë "marshall" që po bën një punë të shkëlqyer si ndërmjetës.
Zëvendëspresidenti JD Vance theksoi synimin për një "marrëveshje të madhe", por pranoi pengesat si mosbesimi i thellë dhe çështjet kryesore si programi bërthamor iranian dhe Ngushticën e Hormuzit. Autoritetet iraniane thanë se nuk kanë "asnjë informacion" për një takim të dytë, pas dështimit të raundit të fundit në Pakistan.
Bllokada detare amerikane ndaj porteve iraniane, e nisur në kontekstin e 47 ditëve të luftës, raportohet si e zbatuar plotësisht nga Komanda Qendrore e SHBA-ve (Centcom). Admirali Brad Cooper njoftoi se në 24 orët e fundit asnjë anije nuk kaloi Ngushticën e Hormuzit, ndërsa 6 anije u kthyen mbrapsht. Operacioni përfshin 10 mijë ushtarakë, dhjetëra anije dhe mjete ajrore.
Megjithatë, mediat britanike si BBC raportojnë se 4 anije të lidhura me Iranin dhe 3 të tjera kaluan ngushticën pas nisjes së bllokadës, duke krijuar kontradiktë mbi efektivitetin e saj.
Zhvillime në Liban
Në Uashington u zhvillua një takim mes diplomatëve izraelitë dhe libanezë me ndërmjetësimin e sekretarit amerikan të Shtetit Marko Rubio. Palët ranë dakord për çarmatosjen e Hezbollahut, detyrë që merr përsipër ushtria libaneze. Ambasadori libanez pranoi vazhdimin e operacioneve izraelite kundër militantëve pro-iranianë, ndërsa sulmet në jug të Libanit kanë lënë mbi 2100 viktima libanezë.
Përditësime
Donald Trump u tha ABC News-it se ka "dy ditë të mrekullueshme përpara", ndërsa armëpushimi dyjavor përfundon më 21 prill pa nevojë për zgjatje.
Trump shtoi: "Ata kanë një regjim të ndryshëm tani, eliminuam radikalët."
Zyrtarë pakistanezë, iranianë dhe të Gjirit konfirmuan kthimin e ekipeve negociuese në Pakistan këtë javë.
Cisterna kineze e sanksionuar Rich Starry u kthye në Ngushticën e Hormuzit.
Çmimet e naftës ranë për të dytën ditë radhazi për shkak të optimizmit.