Presidenti i Turqisë, Rexhep Tajip Erdogan, dhe presidenti i Shteteve të Bashkuara, Donald Trump, zhvilluan të martën një bisedë telefonike, njoftoi Presidenca turke dhe Drejtoria e Komunikimeve të saj.
Gjatë bisedës, dy liderët trajtuan marrëdhëniet dypalëshe Turqi–SHBA, zhvillimet në Siri, procesin e paqes në Gaza, bashkëpunimin tregtar me theks në industrinë e mbrojtjes, si dhe çështje rajonale dhe ndërkombëtare.
Erdogan theksoi se Ankaraja do të vazhdojë të ndërmarrë hapa për forcimin e bashkëpunimit me Uashingtonin, duke nënvizuar se zhvillimi i marrëdhënieve në të gjitha fushat është në interes të përbashkët të dy vendeve.
Sa i përket Sirisë, presidenti turk vuri në dukje rëndësinë e zbatimit të plotë të armëpushimit dhe marrëveshjes së integrimit, duke shtuar se situata po monitorohet nga afër në koordinim me autoritetet amerikane dhe siriane.
Në lidhje me Gazën, Erdogan shprehu shpresën për funksionimin e suksesshëm të Bordit të Paqes, duke theksuar se ndalimi i krizës humanitare dhe rindërtimi i rajonit do të hapin rrugën për një paqe të qëndrueshme në Lindjen e Mesme.