Presidenti i Shteteve të Bashkuara, Donald Trump, ka ftuar përfaqësues të vendeve të ndryshme në Bordin e Paqes për Gazën, duke përfshirë Kosovën dhe Shqipërinë. Ky bord u krijua si pjesë e fazës së dytë të armëpushimit mes Izraelit dhe militantëve palestinezë të grupit Hamas.
Bordi vepron si trup këshillues, ku liderët botërorë japin këshilla dhe ndihmojnë në negociata, por nuk ka fuqi ekzekutive ndërkombëtare si Organizata e Kombeve të Bashkuara. Synimi kryesor është mbështetja e paqes dhe stabilitetit në rajon përmes dialogut dhe bashkëpunimit ndërkombëtar. Shtëpia e Bardhë thekson se bordi do të trajtojë çështje si ndërtimi i kapaciteteve qeveritare, marrëdhëniet rajonale, rindërtimi, tërheqja e investimeve, financimi në shkallë të gjerë dhe mobilizimi i kapitalit.
Kosovën do ta përfaqësojë presidentja Vjosa Osmani, ndërsa Shqipërinë kryeministri Edi Rama. Trump pritet të njoftojë përbërjen e plotë dhe detaje të tjera gjatë Forumit Ekonomik Botëror në Davos.
Përbëria e njohur e bordit
- Donald Trump, kryetar
- Marco Rubio, Sekretari i Shtetit i SHBA-së
- Steve Witkoff, negociatori special i Trump
- Jared Kushner, dhëndri i Trump
- Tony Blair, ish-kryeministër i Mbretërisë së Bashkuara
- Marc Rowan, miliarder financier amerikan
- Ajay Banga, president i Bankës Botërore
- Robert Gabriel, ndihmës i Trump
Iniciativa nuk është mirëpritur nga të gjitha vendet. Franca ka refuzuar pjesëmarrjen, siç e konfirmoi presidenti Emmanuel Macron. Mediat raportojnë se kryeministri britanik Keir Starmer do ta refuzojë ftesën.