Donald Trump, president i SHBA-së, u shpreh kundër veshjes së jelekut antiplumb në daljet e ardhshme publike, pas sulmit në Darkën e Korrespondentëve të Shtëpisë së Bardhë.
Ai e arsyetoi qëndrimin me shqetësimin për pamjen. "Nuk e di nëse më pëlqen të dukem 10 kilogramë më i shëndoshë", u përgjigj kur u pyet nga gazetarët në Shtëpinë e Bardhë.
Ditët e fundit, mediat amerikane kanë raportuar diskutime në nivelet më të larta të qeverisë për mundësinë që Trump të detyrohet të përdorë këtë masë sigurie. "Është ndoshta diçka që dikush duhet ta marrë në konsideratë. Nga njëra anë, nuk dua ta bëj sepse është si t’i dorëzohesh të keqes. Kështu që nuk e di. Megjithatë, më është kërkuar", deklaroi ai.
Sulmi në Darkën e Korrespondentëve konsiderohet përpjekja e tretë kundër Trumpit në dy vitet e fundit. Më i rëndi mbetet incidenti në një tubim në Pensilvani në 2024, ku u dëmtua në vesh nga të shtënat me armë zjarri.
Sipas kontrollit mjekësor të prillit 2025, Trump peshon 101.6 kilogramë, rreth 10 kilogramë më pak se në vitin 2019.