Presidenti amerikan Donald Trump ndërpreu për pak çaste fjalimin në një tubim elektoral në Daytona Beach, Florida, pasi pati vështirësi të mbante njërin sy hapur. Ngjarja ndodhi rreth një orë pas nisjes së aktivitetit, të mbajtur në kuadër të fushatës për zgjedhjet e mesmandatit në SHBA, që pritet të zhvillohen të martën, më 3 nëntor.
Trump u tha të pranishmëve se kishte diçka në sy dhe kërkoi mirëkuptimin e tyre. Ai lagu me ujë një pecetë dhe pastroi syrin. Më pas tha se ndihej më mirë dhe hodhi ujin e mbetur drejt publikut. Presidenti përmendi edhe pikat e syve, duke thënë se do të kishte dashur t’i kishte me vete. Ai shtoi se, po t’i përdorte, kritikët do të thoshin se ishte shumë i sëmurë dhe se diçka nuk shkonte me të.
Trump kishte anuluar fillimisht dy tubime të planifikuara në Kansas dhe Iowa, por të dyja aktivitetet u rikthyen në kalendar të premten. Një ditë para tubimit në Florida, ai pati një përplasje me një gazetar të Reuters, i cili e pyeti nëse udhëtimi drejt Kansasit ishte anuluar për shkak të lodhjes nga angazhimet dhe udhëtimet. Trump e fyeu gazetarin dhe komentoi pamjen e tij fizike.
Gjatë tubimit pati ndërhyrje nga protestues dhe të paktën tre persona u larguan nga aktiviteti. Trump pretendoi se protestuesit paguheshin nga miliarderi dhe donatori demokrat George Soros, por nuk paraqiti prova për këtë pretendim.
Në fjalim, Trump kritikoi demokratët dhe përsëriti premtimin se çdo qytetar i rritur amerikan do të merrte 5 mijë dollarë, nëse republikanët siguronin shumicën në të dyja dhomat e Kongresit. Ai foli gjithashtu për Iranin, duke pretenduar se operacionet amerikane kishin neutralizuar kapacitetet bërthamore të Teheranit, dhe përmendi arrestimin e presidentit venezuelian Nicolás Maduro.