Presidenti i Shteteve të Bashkuara, Donald Trump, deklaroi se Irani do të "fshihet nga faqja e dheut", nëse sulmon anijet amerikane që përpiqen të rihapin Ngushticën e Hormuzit. Ky paralajmërim erdhi më 4 maj në një intervistë për Fox News, në kohën kur SHBA zhvillon një operacion detar për të shoqëruar dhe nxjerrë në mënyrë të sigurt nga zona anijet e bllokuara në këtë rrugë detare jetike për furnizimin global me naftë.
Më shumë se 800 anije dhe rreth 20.000 anëtarë ekuipazhi mbeten të bllokuar. Trump e përshkroi operacionin si "një nga manovrat më të mëdha ushtarake të bëra ndonjëherë". Ai shtoi se Irani është bërë "shumë më fleksibël" në negociatat për paqe dhe se SHBA posedon kapacitete ushtarake superiore ndaj Republikës Islamike.
Sipas Uashingtonit, dhjetëra anije tregtare janë ridrejtuar për shkak të tensionit të vazhdueshëm. Irani paralajmëroi se do të sulmojë anijet amerikane që afrohen ngushticës dhe mohoi pretendimet e SHBA-së se ka shkatërruar gjashtë anije të vogla iraniane, si dhe ka kapur raketa e dronë iranianë.
Reagimi i Teheranit
Ministri i Jashtëm iranian, Abbas Araqchi, në një postim në platformën X më 4 maj, u bëri thirrje Emirateve të Bashkuara Arabe të mos mbështesin "zgjidhjen ushtarake" kundër Iranit. Ai theksoi se "nuk ka zgjidhje ushtarake" për krizën dhe se bisedimet po përparojnë falë përpjekjeve të Pakistanit. "Shtetet e Bashkuara duhet të jenë të kujdesshme që të mos tërhiqen përsëri në një moçal nga keqdashësit. Emiratet e Bashkuara Arabe duhet të mbeten gjithashtu vigjilente", shtoi ai.
Që nga fillimi i sulmeve të Shteteve të Bashkuara dhe Izraelit kundër Iranit më 28 shkurt, EAU ka qenë ndër vendet më të prekura të Gjirit Persik nga sulmet iraniane, të cilat Teherani i cilësoi përgjigje ndaj fushatës ushtarake SHBA-Izrael.