Presidenti i Shteteve të Bashkuara, Donald Trump, tha të shtunën se Irani ka qenë pranë arritjes së një marrëveshjeje të plotë me SHBA-në “katër apo pesë herë”, por është tërhequr vazhdimisht në çastin e fundit.
“Sa herë që pajtohen, të nesërmen bëhen sikur nuk kemi folur fare”, tha Trump për Fox News. “Kjo ka ndodhur katër ose pesë herë. Ka diçka që nuk shkon me ta. Sinqerisht, janë të çmendur”.
Ai shtoi se Irani kishte pranuar më herët t’ia dorëzonte Shteteve të Bashkuara rezervat e uraniumit të pasuruar. “Jo armë bërthamore”, tha Trump. “Ata do të na jepnin pluhurin bërthamor. Çfarëdo që ne dëshironim”.
Zyrtarët iranianë, përfshirë ministrin e Jashtëm Abbas Araqchi, e kanë mohuar se kanë pranuar kushtet e SHBA-së. Araqchi tha se çështja e pasurimit është e ndërlikuar dhe propozoi që diskutimi të shtyhej.
Trump bëri komentet edhe para vizitës së tij në Kinë dhe theksoi se presidenti kinez Xi Jinping ishte pajtuar që lufta duhet të përfundojë. Bisedimet për përfundimin e luftës u pezulluan javën e kaluar.