Presidenti amerikan Donald Trump paralajmëroi se Shtetet e Bashkuara mund të largohen nga Europa nëse kontinenti nuk arrin të përballojë emigracionin. Ai i bëri komentet gjatë një tubimi në Kansas, ku foli edhe për protestat në Francë.
“Nëse nuk gjejnë së shpejti rrugën e duhur, nuk do të kemi zgjidhje tjetër veçse të largohemi”, deklaroi Trump. Ai kritikoi politikat e emigracionit të politikanëve të majtë, duke i akuzuar se kanë lejuar hyrjen e miliona emigrantëve nga vendet në zhvillim. “Politikanët e krahut të majtë kanë importuar miliona e miliona emigrantë nga Bota e Tretë. Ne nuk do të lejojmë që kjo t’i ndodhë vendit tonë”, u shpreh presidenti.
Trump tha se nuk do ta harrojë kurrë sjelljen e Europës kur SHBA-ja kërkoi ndihmë për Iranin. “Kur kërkuam ndihmë në Iran, ata nuk na dhanë një dorë, dhe ne shpenzuam kaq shumë për NATO-n. Kjo është diçka që nuk mund ta harrojmë kurrë”, deklaroi ai.
Gjatë tubimit në Kansas, Trump njoftoi një program ndihme prej 8 miliardë dollarësh për fermerët amerikanë. Programi synon të kompensojë përkohësisht kostot e larta të naftës për makineritë bujqësore gjatë sezonit të korrjeve. Sipas mediave amerikane, ai do të zbatohet nga Departamenti i Bujqësisë.
Njoftimi vjen në kuadër të një serie angazhimesh financiare të presidentit përpara zgjedhjeve të mesmandatit, të cilat përcaktojnë kontrollin e Kongresit amerikan.