Presidenti i Shteteve të Bashkuara të Amerikës, Donald Trump, hodhi poshtë kritikat e kryeministrit izraelit, Benjamin Netanyahu, lidhur me shitjen e mundshme të avionëve luftarakë F-35 për Turqinë. Gjatë një prononcimi për gazetarët në bordin e avionit presidencial, Trump theksoi se askush nuk mund t'i diktojë vendimet mbi shitjen e pajisjeve ushtarake amerikane.
Aktualisht, ky transaksion është i ndaluar nga legjislacioni i SHBA-së, si pasojë e blerjes nga ana e Ankarasë të sistemeve të mbrojtjes ajrore të prodhuara në Rusi. Megjithatë, kreu i Shtëpisë së Bardhë ka bërë të ditur se po shqyrton mundësinë e lejimit të këtij blerjeje, duke e cilësuar Turqinë si një "aleat të jashtëzakonshëm" që ka dhënë kontribute të rëndësishme në çështjet rajonale, veçanërisht në Siri.
Duke komentuar marrëdhëniet mes Ankarasë dhe Tel Avivit, presidenti amerikan pranoi se Turqia "nuk është një adhuruese e madhe" e Izraelit apo e kryeministrit Netanyahu. Megjithatë, ai rikonfirmoi miqësinë e tij me presidentin turk, Recep Tayyip Erdogan, duke e vlerësuar atë si një partner besnik brenda NATO-s.
Lidhur me takimin e pritshëm me Netanyahun në Uashington këtë javë, Trump deklaroi se ai dhe kryeministri izraelit ndajnë pikëpamje shumë të përafërta mbi çështjen e Iranit, duke e përshkruar dallimin e vetëm mes tyre si "të vogël". Ky qëndrim vjen pas zotimit të Trump-it gjatë samitit të NATO-s se do të konsiderojë rikthimin e këtyre shitjeve ushtarake për Turqinë.