Presidenti amerikan Donald Trump ka lënë të kuptohet se lufta me Iranin ka mundësi të jetë afër përfundimit. Ai foli për gazetarë më 9 mars në klubin e tij të golfit në Florida, duke dhënë një vlerësim optimist për konfliktin që ka shkaktuar tensione rajonale dhe paqëndrueshmëri në tregjet globale të energjisë.
Trump tha se lufta “do të përfundojë së shpejti”, megjithëse nuk dha afat të qartë dhe sugjeroi se operacionet mund të vazhdojnë përtej kësaj jave. “Ne mund ta lëmë me kaq, por do të shkojmë më tej”, u shpreh ai, duke argumentuar se ndërhyrja e SHBA-së ia ka pamundësuar Iranit “ta marrë nën kontroll Lindjen e Mesme”.
Qasje e re ushtarake
Optimizmi i presidentit vjen në mes të një debati në Uashington rreth synimeve, kostove dhe trajektoresë së luftës. Disa ish-zyrtarë të administratës së tij e shohin qasjen si pjesë të një ndryshimi në mënyrën se si Uashingtoni mendon për fuqinë ushtarake.
Alexander Gray, i cili shërbeu në Këshillin e Sigurisë Kombëtare gjatë administratës së parë të Trumpit, foli për Radion Evropa e Lirë (REL) më 9 mars. Ai tha se presidenti sfidon kornizën e formuar nga Lufta e Irakut 2003–2011, ku vendimet paraqiteshin si alternativa binare: ose forca të mëdha tokësore për ndërtim shteti, ose shmangie totale e veprimit ushtarak.
“SHBA-ja mund të kryejë sulme të synuara kirurgjikale dhe me kohëzgjatje të kufizuar për qëllime të qarta, të përcaktuara dhe realiste, dhe të arrijë qëllimet kombëtare”, argumentoi Gray. Nëse kjo qasje ka sukses në Iran, ajo mund të sjellë përfitime të mëdha gjeopolitike për Shtetet e Bashkuara dhe partnerët e tyre.
Skepticizëm nga analistët
Analistë të tjerë janë më skeptikë ndaj mesazheve të administratës, duke thënë se ato mund të formësohen për narrativën e luftës.