Presidenti amerikan Donald Trump mbajti fjalimin më të gjatë drejtuar kombit në historinë e Shteteve të Bashkuara, i cili zgjati gati 1 orë e 50 minuta. Në seancën e përbashkët të Kongresit amerikan, ai përsëriti kërcënimin për veprim ushtarak kundër Iranit nëse diplomacia dështon dhe u zotua se do të vazhdojë negociatat për t’i dhënë fund luftës në Ukrainë.
Fjalimi shërbeu për të paraqitur arritjet e administratës së tij, të cilat Trump i cilësoi si agim i një "epoke të artë". Ai u përqendrua kryesisht në politikat e brendshme përpara zgjedhjeve afatmesme të nëntorit, por rikonfirmoi edhe prioritetet në politikën e jashtme dhe sigurinë botërore.
Irani
Trump i kushtoi disa minuta Iranit, të cilin e paraqiti si kërcënim të drejtpërdrejtë dhe të vazhdueshëm. Ai rikujtoi sulmet ushtarake të SHBA-së ndaj këtij shteti në qershor të vitit të kaluar, në kuadër të operacionit Çekani i Mesnatës.
"Pas [operacionit] Çekani i Mesnatës, ata u paralajmëruan që të mos bënin përpjekje të reja për të rindëmtuar programin e tyre të armëve, veçmas të armëve bërthamore. Megjithatë, ata vazhdojnë të nisin gjithçka nga e para", tha ai.
"Unë preferoj që ta zgjidh këtë problem përmes diplomacisë. Por, një gjë është e sigurt: Unë kurrë nuk do të lejoj sponsorin numër një në botë të terrorit, që ata janë, të ketë armë bërthamore. Nuk mund ta lejoj një gjë të tillë", shtoi Trump.
Këto deklarata u bënë në një kohë të grumbullimit masiv ushtarak të SHBA-së në Lindjen e Mesme dhe përpara rundit të ri të bisedimeve mes SHBA-së dhe Iranit më 26 shkurt. Bisedimet përqendrohen në programin bërthamor iranian, për të cilin Teherani këmbëngul se ka qëllime paqësore dhe civile, si prodhimi i energjisë elektrike.
"Për dekada të tëra, ka qenë politikë e Shteteve të Bashkuara që të mos lejojë kurrë Iranin të ketë armë bërthamore", theksoi presidenti, duke iu referuar udhëheqjes klerikale që nga revolucioni islamik.
Përditësime
- Autoritetet iraniane kanë vrarë të paktën 32.000 protestues në dy muajt e fundit gjatë protestave, kryesisht duke i qëlluar ose varur.
- SHBA ka penguar Iranin nga varja e shumë protestuesve duke kërcënuar me pasoja të rënda.
- Irani ka zhvilluar raketa që kërcënojnë Evropën dhe bazat amerikane jashtë vendit, si dhe po punon për raketa me rreze veprimi deri në SHBA.