Presidenti i Shteteve të Bashkuara të Amerikës, Donald Trump, njoftoi se ka pezulluar sulmin ushtarak të planifikuar ndaj Iranit. Njoftimi u bë përmes një postimi në rrjetin social Truth Social.
Trump deklaroi se udhëheqësit e Katarit, Arabi së Saudite dhe Emirateve të Bashkuara Arabe i kërkuan të shtyjë operacionin, i cili ishte caktuar për të nesërmen. Ata e motivuan kërkesën me faktin se negociata serioze po zhvillohen aktualisht dhe se pritet të arrihet një marrëveshje e pranueshme për të gjitha palët, me kushtin kryesor që Irani të mos ketë armë bërthamore.
Kreu i Shtëpisë së Bardhë shtoi se ka udhëzuar Sekretarin e Luftës Pete Hegseth, Kryetarin e Shtabit të Përbashkët të Ushtrisë, Gjeneral Daniel Caine, dhe forcat e armatosura amerikane që të mos kryejnë sulmin e planifikuar. Megjithatë, ai theksoi se ushtria do të jetë e gatshme të kalojë në një sulm të plotë dhe në shkallë të gjerë ndaj Iranit në çdo moment, nëse nuk arrihet një marrëveshje e pranueshme.
Irani nuk ka dhënë ende asnjë reagim publik ndaj kësaj deklarate. Sulmet ajrore izraelite dhe amerikane ndaj Iranit filluan më 28 shkurt, ndërsa një armëpushim i arritur në prill është respektuar kryesisht, pavarësisht shkëmbimeve të herëpashershme të zjarrit.
Përditësime
Shtetet e Bashkuara paraqitën një propozim 5-pikësh që kërkon nga Irani të mbajë vetëm një objekt bërthamor aktiv dhe të transferojë uraniumin e pasuruar në SHBA. Teherani hodhi poshtë një memorandum 14-pikësh amerikan që përcaktonte parametrat për përfundimin e luftës. Presidenti Trump paralajmëroi se armëpushimi është në "mbështetje masive jetësore", se "ora po troket" për Iranin dhe se ekziston "shans shumë i mirë" për një marrëveshje bërthamore.
Gjatë natës situata ka mbetur e qetë, pa raporte për përplasje ushtarake pas deklaratës së Presidentit Donald Trump për pezullimin e sulmeve ndaj Iranit. Megjithatë, një sulm iranian goditi ndërtesën e një kompanie kineze në Kuvajt, duke shkaktuar vdekjen e një punonjësi. Forcat e Armatosura të Kuvajtit njoftuan se, para këtij incidenti fatal, kishin neutralizuar disa sulme të tjera me dronë gjatë së shtunës.