Presidenti i Shteteve të Bashkuara, Donald Trump, ka zbuluar detaje të reja mbi incidentin me të shtëna që ndodhi gjatë darkës së korrespondentëve të Shtëpisë së Bardhë, duke e cilësuar atë si një sulm ndaj një eventi të rëndësishëm për lirinë e fjalës.
Duke folur nga Shtëpia e Bardhë, i shoqëruar nga zyrtarë të lartë të sigurisë, Trump deklaroi se një person i armatosur kishte tentuar të kalonte një pikë kontrolli sigurie, ndërsa mbante me vete disa armë. Ai kishte avancuar me shpejtësi nga rreth 50 metra distancë.
Sipas presidentit, autori u neutralizua nga agjentët e Shërbimit Sekret i SHBA, të cilët ai i përshkroi si “shumë të guximshëm”. Gjatë ndërhyrjes, një agjent mbeti i plagosur, por arriti të shpëtojë falë jelekut antiplumb. “Një burrë i armatosur me disa armë u përpoq të kalonte kontrollin e sigurisë. Ai u neutralizua nga anëtarë shumë të guximshëm të Shërbimit Sekret”, u shpreh Trump, duke shtuar se i dyshuari tashmë ndodhet në paraburgim.
Presidenti e përshkroi autorin si “një person shumë i sëmurë”. Ndërkohë, hetimet janë shtrirë në Kaliforni, ku autoritetet kanë arritur në banesën e të dyshuarit për të mbledhur prova shtesë.
Trump konfirmoi se ai vetë nuk ka pësuar lëndime, ndërsa eventi do të riplanifikohet në një datë tjetër. Ai shtoi se përvoja ishte traumatike për Zonjën e Parë, Melania Trump.