Donald Trump, presidenti i Shteteve të Bashkuara, refuzoi të thoshte nëse armëpushimi i brishtë me Iranin mbetet në fuqi pas incidentesh në Ngushticën e Hormuzit, ku të dyja palët pretenduan se kanë qëlluar.
Gjatë intervistës mbrëmë në emisionin radiofonik të prezantuesit Hugh Hewitt, Trump u pyet nëse armëpushimi kishte mbaruar dhe nëse sulmet do të rifillojnë. Ai u përgjigj: „Epo, nuk mund t’ju them këtë”. Më tej, shtoi: „Nëse do t’i përgjigjesha kësaj pyetjeje, do të thoshit se ky njeri nuk është mjaftueshëm i zgjuar për të qenë president”.
Më parë, në një intervistë me Fox News, Trump paralajmëroi forcat iraniane se do t’i „hiqte nga faqja e dheut” nëse përpiqeshin të synonin anijet amerikane në Ngushticën e Hormuzit ose në Gjirin Persik. Ai këmbënguli se lufta me Iranin, „ushtarakisht… në thelb ka mbaruar”.
SHBA ka hedhur poshtë pretendimin iranian se forcat e tyre goditën një luftanije amerikane që po përpiqej të hynte në ngushticë. Ndërkohë, Irani lëshoi katër raketa drejt Emirateve të Bashkuara Arabe më 4 maj, ku tre u rrëzuan nga sistemet e mbrojtjes ajrore, ndërsa e katërta ra në det.
Ngushtica e Hormuzit mbetet e bllokuar për më shumë se dy muaj për shkak të kërcënimeve të Teheranit, çka ka rritur çmimet e energjisë dhe ka ndikuar në ekonominë globale. Autoritetet amerikane kanë nisur përpjekje për të rikthyer qarkullimin e anijeve tregtare në këtë rrugë jetike.