Presidenti i SHBA-së, Donald Trump, ka kërkuar nga Kina shtyrjen e vizitës së tij të planifikuar në Pekin për shkak të luftës në Iran. Ky njoftim u bë të hënën në Washington, ku Trump deklaroi: "Mendoj se është e rëndësishme që unë të jem këtu."
Vizita ishte paraparë nga 31 marsi deri më 2 prill 2026 dhe do të ishte udhëtimi i parë i Trump në Kinë gjatë mandatit të tij të dytë. Ajo synonte stabilizimin e marrëdhënieve mes Shteteve të Bashkuara dhe Kinës, të tensionuara nga rivaliteti strategjik, tregtar, teknologjik dhe ushtarak në Indo-Paqësor, si dhe fushata e tarifave të nisur nga Trump.
Shtyrja vjen ndërsa lufta SHBA-Izrael kundër Iranit po zgjerohet, duke ushtruar presion të madh ushtarak dhe ekonomik mbi Uashington. Të martën, më 17 mars 2026, Trump njoftoi se udhëtimi do të zhvillohet "brenda pesë ose gjashtë javësh". Ai shtoi: "Ne po punojmë me Kinën. Ata janë në rregull me këtë."
Të dielën, Trump sugjeroi se koha e vizitës mund të varet nga ndihma e Kinës për zhbllokimin e Ngushticës së Hormuzit, të cilën Irani e ka mbyllur de facto si përgjigje ndaj sulmeve SHBA-Izrael.
Lin Jian, zëdhënës i Ministrisë së Jashtme të Kinës, deklaroi të mërkurën se "si Kina ashtu edhe Shtetet e Bashkuara do të vazhdojnë të kujdesen për ruajtjen e komunikimit lidhur me vizitën e Presidentit Trump në Kinë".
John Seaman, nga Qendra për Studime Aziatike në Institutin Francez për Marrëdhënie Ndërkombëtare (Ifri), vlerësoi se shtyrja jep një sinjal të qartë: "Shtyrja e udhëtimit të shumëpritur në Pekin sugjeron qartë se Trump po ngec në Lindjen e Mesme — ashtu si SHBA ka bërë shpesh në të kaluarën."
Përditësime
John Seaman shton se shtyrja tregon se Donald Trump po humb fokusin ndaj Kinës.
Ai shpjegon se vizita nuk ishte përgatitur plotësisht, pavarësisht takimeve planifikuese në Paris midis zyrtarëve amerikanë dhe kinezë.
Seaman thekson se një vizitë e tillë kërkon muaj planifikimi serioz dhe negociatash, dhe Xi Jinping nuk improvizon.