Donald Trump, presidenti i SHBA-së, ka urdhëruar Departamentin e Mbrojtjes të sigurojë energji elektrike nga termocentralet me qymyr, si pjesë e përpjekjeve për të mbështetur industrinë e këtij burimi energjetik.
Urdhri ekzekutiv u nënshkrua gjatë një ceremonie në Shtëpinë e Bardhë, ku Trump u shfaq i shoqëruar nga minatorë me helmeta sigurie. Dokumenti urdhëron Pentagonin të lidhë marrëveshje afatgjata për furnizim me energji të prodhuar nga djegia e qymyrit, me qëllim garantimin e furnizimit të pandërprerë për instalimet dhe objektet ushtarake strategjike. Administrata Trump është shprehur kritike ndaj burimeve të rinovueshme, sidomos energjisë së erës, të cilën e konsideron të paqëndrueshme.
Gjatë ceremonisë, Trump e cilësoi qymyrin “absolutisht thelbësor për sigurinë kombëtare”, ndërsa përfaqësues të industrisë e vlerësuan si “mbrojtësin më të madh të qymyrit”. Djegia e qymyrit prodhon rreth një të tretën e energjisë elektrike në botë, por mbetet një nga kontribuuesit kryesorë në emetimet e CO₂ dhe ngrohjen globale.
Që nga rikthimi në pushtet në janar 2025, administrata ka mbështetur sektorin e qymyrit, duke detyruar disa kompani të mbajnë hapur termocentrale që planifikonin t’i mbyllnin. Kjo politikë bie ndesh me strategjitë e administratave të mëparshme për uljen e emetimeve dhe trendin e tregut energjetik.
Prodhimi i qymyrit në SHBA ka rënë për rreth 15 vjet, pasi është zëvendësuar nga burime më të lira dhe më të pastra si gazi natyror dhe energjitë e rinovueshme. Në vitin 2023, qymyri përbënte pak më shumë se 16% të përzierjes energjetike amerikane, krahasuar me rreth 50% në vitin 2000.
Administrata pritet të anulojë një akt rregullator që shërben si bazë për politika të shumta të uljes së emetimeve të gazrave serrë, çka mund të ndikojë në rregullimin e sektorit të energjisë dhe funksionimin e termocentraleve.