Ushtria amerikane, përmes Pentagonit dhe Departamentit të Energjisë, realizoi transportin nga ajri të një mikroreaktori bërthamor 5 megavatësh pa karburant bërthamor. Fluturimi u krye fundjavën e kaluar nga Kalifornia në Utah, mbi një distancë prej gati 1126 kilometrash, me avionin ushtarak C-17. Kjo demonstron, sipas tyre, potencialin e Shteteve të Bashkuara për të vendosur shpejt energjinë bërthamore në përdorim ushtarak dhe civil.
Sekretari i Energjisë Chris Wright dhe Nënsekretari i Mbrojtjes Michael Duffey udhëtuan bashkë me reaktorin, të ndërtuar nga sektori privat. Ata e vlerësuan operacionin si përparim në përpjekjet për të përshpejtuar licencimin komercial të mikroreaktorëve. Kjo është pjesë e një strategjie më të gjerë të administratës Donald Trump, që synon të riformësojë peizazhin energjetik të vendit, duke promovuar energjinë bërthamore për të plotësuar kërkesën në rritje nga inteligjenca artificiale, qendrat e të dhënave dhe ushtria.
Presidenti Donald Trump mbështet energjinë bërthamore si burim të besueshëm pa karbon, ndërkohë që ka qenë kritik ndaj energjisë së rinovueshme dhe preferon qymyrin si dhe lëndët djegëse fosile për prodhimin e energjisë elektrike. Vitin e kaluar, ai nënshkroi një sërë urdhrash ekzekutivë që i lejojnë Chris Wright-in të miratojë disa dizajne dhe projekte të avancuara reaktorësh, duke ia hequr autoritetin Komisionit të Pavarur Rregullator Bërthamor.
Skeptikët paralajmërojnë për rreziqet e energjisë bërthamore dhe dyshojnë në sigurinë, realizueshmërinë e mikroreaktorëve si dhe aftësinë e tyre për të ofruar çmime të arsyeshme. Wright i la mënjanë këto shqetësime, duke vlerësuar përparimin në përpjekjet për përshkallëzim të shpejtë të energjisë bërthamore.