Pas serisë së protestave të zhvilluara në Prishtinë, mbështetja për ish-krerët e UÇK-së do të shtrihet edhe në shtete të ndryshme të diasporës. Platforma Liria ka Emër ka bërë të ditur se tubimet kanë për qëllim shprehjen e kundërshtimit ndaj vendimit të Dhomave të Specializuara në Hagë, ku katër figurat kryesore u dënuan me një dënim të përbashkët prej 81 vjetësh heqje lirie.
Sipas njoftimeve zyrtare, organizimet në diasporë janë planifikuar për fundjavën e 19 dhe 20 shtatorit 2026.
Kalendari i tubimeve në diasporë
- Zvicër: Tubimi në Zurich është planifikuar për ditën e shtunë, në orën 15:00.
- Gjermani: Tubimi në Koln do të zhvillohet të shtunën, në orën 20:00.
- Kanada: Tubimi në Vancouver do të mbahet të shtunën, në orën 18:00.
- Austri: Tubimi në Vjenë është parashikuar për ditën e diel, në orën 14:00.
Këto tubime vijnë në vazhdën e protestave që po mbahen për të tretën natë radhazi në Kosovë. Lidhur me pjesëmarrjen në protestën e së premtes në Prishtinë, raportimet ndryshojnë, ku disa burime theksojnë praninë e mijëra qytetarëve, ndërsa të tjera raportojnë për qindra pjesëmarrës.
Përditësime
Grupe të rinjsh shqiptarë në diasporë kanë marrë përsipër organizimin e tubimeve, të cilat do të zhvillohen nën moton 'Jo në emrin tim!'. Në Cyrih, protestuesit do të mblidhen në Helvetiaplatz, pasi kanë marrë lejen zyrtare nga policia vendase. Tubimi në Këln do të fokusohet te hapësira e stacionit qendror Köln HBF, ndërsa në Vjenë, protesta do të zhvillohet në sheshin Heldenplatz.
Dhomat e Specializuara shpallën vendimet për ish-krerët e UÇK-së, ku Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet dhe Rexhep Selimi me 13 vjet. Protestuesit në Prishtinë kërkuan shfuqizimin e Ligjit për Dhomat e Specializuara, shkarkimin e ministres Donika Gërvalla dhe mbështetje financiare për mbrojtjen ligjore të të akuzuarve. Një protestë e ngjashme mbështetëse u zhvillua edhe në Munih të premten.
Partia Demokratike e Kosovës (PDK) ka paralajmëruar dorëzimin e një nisme ligjore që synon ndryshimin e ligjit për Gjykatën Speciale. Organizatorët kanë konfirmuar vazhdimin e protestës në Prishtinë, e cila është caktuar për datën 19 shtator, në orën 21:00. Platforma 'Liria ka Emër' ka marrë zyrtarisht përsipër organizimin dhe koordinimin e të gjitha tubimeve në diasporë në mbështetje të ish-krerëve të UÇK-së.
Platforma 'Liria ka Emër' ka konfirmuar zyrtarisht mbajtjen e tubimit në Cyrih, Zvicër, përmes publikimit të pamjeve vizuale nga vendngjarja. Organizimi në këtë qytet është përmbyllur sipas agjendës së planifikuar, duke iu bashkuar valës së protestave të diasporës në mbështetje të ish-krerëve të UÇK-së.