Platforma qytetare Liria ka Emër ka prezantuar një sërë aktivitetesh në mbështetje të ish-drejtuesve të Ushtrisë Çlirimtare të Kosovës (UÇK), në prag të shpalljes së aktgjykimit nga Gjykata Speciale, që pritet të ndodhë më 16 shtator. Përfaqësuesit e platformës, Ismail Tasholli dhe Eliza Hoxha, njoftuan se tubimi kryesor në Hagë do të nisë më 15 shtator në orën 22:00 dhe do të vazhdojë deri më 16 shtator në orën 10:00.
Sipas Ismail Tashollit, ky tubim, i quajtur "Nata e Pritjes", synon të jetë një formë organizimi paqësor dhe dinjitoz në bashkëpunim me mërgatën shqiptare. Ai theksoi se janë duke u ndjekur të gjitha procedurat ligjore për dorëzimin e kërkesave tek autoritetet holandeze dhe se pjesëmarrësit do të respektojnë rregullat e sigurisë.
Ndërkohë, Eliza Hoxha prezantoi aktivitetet që po zhvillohen brenda territorit të Kosovës. Deri më tani, është bashkëpunuar me komunat e Prishtinës, Skenderajt, Vushtrrisë, Vitisë dhe Prizrenit për vendosjen e orëve të numërimit mbrapsht dhe zbukurimin e hapësirave publike me simbole të UÇK-së. Ajo bëri thirrje edhe komunave të tjera që t'i bashkohen kësaj nisme.
Platforma gjithashtu u ka kërkuar drejtorive komunale të arsimit që java e parë e procesit mësimor t’i kushtohet aktiviteteve edukative lidhur me historinë e luftës çlirimtare. Sipas Hoxhës, ky është një hap thelbësor që brezat e rinj të njihen me sakrificën dhe vlerat mbi të cilat është ndërtuar shteti i Kosovës. Organizatorët theksuan se aktivitetet e planifikuara do të vazhdojnë në ditët në vijim, përfshirë përgatitjet për tubime të tjera në komunat e Kosovës dhe në diasporë.