Një grup turistësh që po ngjitej në vullkanin Volcán de Fuego në Guatemalë përjetoi momente paniku, pasi vullkani shpërtheu papritur duke hedhur në ajër hi, lavë dhe gurë të zjarrtë. Pamjet e publikuara nga vetë vizitorët tregojnë momentin kur ata largohen me vrap për t'u shpëtuar materialeve vullkanike që binin përreth.
Një nga pjesëtaret e grupit, Anna Garcia, rrëfeu përvojën e saj të tmerrshme, duke deklaruar se gurët e nxehtë i dogjën xhaketën, ndërsa një copë shkëmbi kaloi shumë pranë kokës së saj. Ajo e përshkroi ngjarjen si një përvojë të paharrueshme, por jashtëzakonisht të frikshme.
Volcán de Fuego njihet si një nga vullkanet më aktivë në Amerikën Qendrore. Studiuesit bëjnë me dije se ai prodhon shpërthime të vogla gazi dhe hiri çdo 15 deri në 20 minuta.
Historikisht, vullkani ka regjistruar mbi 60 shpërthime që nga viti 1524. Një nga ngjarjet më tragjike në historinë e tij të fundit mbetet shpërthimi i datës 3 qershor 2018, kur rrjedhat e lavës varrosën disa vendbanime dhe shkaktuan mbi 100 viktima. Në atë kohë, reja e hirit u ngrit deri në 33 mijë këmbë lartësi dhe ishte e dukshme edhe nga hapësira.