Turqia ka dënuar fuqishëm sulmin me dron të rebelëve Huthi, i cili kishte për objektiv zonën pranë qytetit të shenjtë të Mekës në Arabinë Saudite. Në një deklaratë zyrtare, Ministria e Punëve të Jashtme turke e cilësoi këtë veprim si të papranueshëm, duke bërë thirrje për ndalimin e menjëhershëm të sulmeve që cenojnë stabilitetin dhe sigurinë në rajon.
Sipas njoftimit të koalicionit arab të udhëhequr nga Arabia Saudite, mbrojtja ajrore arriti të kapë dhe të shkatërrojë dronin në jug të qytetit të shenjtë, duke penguar hyrjen e tij në hapësirën ajrore të kufizuar. Në përgjigje të këtij incidenti, Turqia ka riafirmuar mbështetjen e saj të plotë për sovranitetin, integritetin territorial dhe sigurinë e Arabisë Saudite, duke shprehur solidaritet të plotë me mbretërinë.
Konflikti në Jemen, i cili ka shkaktuar tensione të vazhdueshme rajonale, ka nisur që prej vitit 2014, kur Huthit morën nën kontroll kryeqytetin Sana dhe disa zona të tjera të vendit. Në vitin 2015, një koalicion arab ndërhyri ushtarakisht në mbështetje të qeverisë jemenase të njohur ndërkombëtarisht. Gjatë muajve të fundit, rebelët Huthi kanë shtuar intensitetin e përplasjeve me forcat qeveritare, duke kryer sulme të shpeshta ndaj infrastrukturës së naftës dhe objektivave të tjera strategjike në Arabinë Saudite. Gjithashtu, grupi rebel ka shpallur një bllokadë detare ndaj Riadit dhe ka pretenduar përparime përgjatë bregdetit të Detit të Kuq dhe Ngushticës Bab al-Mandab.