Pas një periudhe të gjatë ftohjeje diplomatike, shkaktuar nga blerja e sistemit raketor rus S-400 dhe përjashtimi nga programi i avionëve F-35 Lightning II, Turqia po shfaqet sërish si një aktor kyç në arkitekturën e sigurisë së Perëndimit. Ndryshimi i situatës gjeopolitike, i diktuar nga lufta në Ukrainë, tensionet në Lindjen e Mesme dhe prioritete të reja të SHBA-së, kanë rikthyer vëmendjen te kapacitetet ushtarake turke.
Industria turke e mbrojtjes, e cila ka përfituar nga investimet publike të qeverisë së Erdoğan, është shndërruar në një sektor dinamik që eksporton dronë, municione dhe sisteme elektronike. Aktualisht, më shumë se gjysma e eksporteve ushtarake të Turqisë destinohen drejt vendeve anëtare të NATO-s.
Takimi i pritshëm midis Donald Trump dhe Recep Tayyip Erdoğan pritet të shërbejë si një sinjal i rëndësishëm për rihapjen e dialogut strategjik. Ekspertët vënë në dukje se miratimi i mundshëm për motorët General Electric për avionin TAI Kaan nuk nënkupton rikthimin e Turqisë në programin F-35, pasi mosmarrëveshjet për sistemet S-400 mbeten ende të pazgjidhura. Paralelisht, vendet evropiane kanë shtuar interesin për bashkëpunim industrial me Turqinë në projekte të përbashkëta mbrojtëse, në kuadër të përpjekjeve për të forcuar kapacitetet e tyre ushtarake.