Turqia vazhdon të pozicionohet si ndërmjetëse midis Lindjes dhe Perëndimit, duke mbajtur marrëdhënie diplomatike me Bashkimin Evropian dhe Lindjen e Mesme. Ankaraja është përpjekur të ndërmjetësojë në mosmarrëveshjen midis Shteteve të Bashkuara dhe Iranit në disa raste, pa sukses.
Ministri i Jashtëm turk Hakan Fidan foli së fundmi për një bisedë telefonike me Uashingtonin në fund të janarit. "Më telefonuan në mes të natës", tha ai. Ai menjëherë e kuptoi se sa serioze ishte situata dhe e informoi urgjentisht Presidentin Rexhep Tajip Erdogan. "Ato ishin kohë shumë të errëta. Ne prisnim luftë ose sulmin e parë në çdo moment", shtoi Fidan, duke përcjellë frustrim nga përpjekjet diplomatike të viteve të fundit.
Ankaraja frikësohet se një luftë me Iranin mund të përshkallëzohet në konflikt rajonal të gjerë. Turqia ndan një kufi 530 kilometra të gjatë me Iranin dhe shqetësohet për pasojat humanitare, ekonomike dhe politike. Ekonomikisht, rrezikon rritje të inflacionit të lartë, probleme me furnizimin me energji dhe humbje në turizëm. Politikisht, ndryshime në ekuilibrin e fuqisë në Lindjen e Mesme dhe ringjallje të mundshme të konfliktit me grupet e armatosura kurde. Për shkak të sulmeve me raketa në Iran dhe Libanin jugor, mund të vijë valë e re refugjatësh.
Deri tani, Irani nuk ka sulmuar bazën ushtarake Incirlik, të përdorur nga forcat amerikane, as qendrën e radarit të NATO-s në Kurecik. Të mërkurën, një raketë balistike u kap nga sistemi i mbrojtjes ajrore të NATO-s. Irani theksoi se Turqia nuk ishte objektivi, ndërsa burime pranë qeverisë turke supozojnë se ishte raketë që doli nga kursi.
Turqia mbetet neutrale dhe ka intensifikuar aktivitetet diplomatike me SHBA-në, BE-në dhe shtetet e Gjirit.