Kombëtarja e Kosovës do të marrë pjesë për herë të parë në Ligën B të Ligës së Kombeve të UEFA-s, pas kualifikimit të siguruar me fitoret në plejof ndaj Islandës në mars të vitit 2025. Më parë, Kosova kishte përfunduar e dyta në grupin e Ligës C me Rumaninë, Qipron dhe Lituaninë, duke grumbulluar 12 pikë nga gjashtë ndeshje.
Shorti për edicionin e ri, që fillon më 24 shtator 2026, do të tërhiqet më 12 shkurt 2026 në Bruksel. Kosova do të jetë në vazon e katërt, bashkë me Suedinë, Maqedoninë e Veriut dhe Irlandën e Veriut. Në grup do të përballet me nga një përfaqësuese nga tre vazoja e para.
Vazot e Ligës B
• Vazoja e parë: Skocia, Hungaria, Polonia, Izraeli.
• Vazoja e dytë: Zvicra, Bosnjë-Hercegovina, Austria, Ukraina.
• Vazoja e tretë: Sllovenia, Gjeorgjia, Irlanda, Rumania.
Ndalimi i përballjes
UEFA ka njoftuar se Kosova nuk mund të jetë në të njëjtin grup me Bosnjë-Hercegovinën (Liga B, vazo 2). "Bazuar në vendimet e Komitetit Ekzekutiv të UEFA-s, të vlefshme në kohën e hedhjes së shortit, ekipet që nuk mund të jenë në një grup, janë: Bosnjë-Hercegovina – Kosova", thuhet në njoftimin zyrtar. Përballjet e tjera të ndaluara nuk mund të ndodhin, pasi ekipet përkatëse nuk luajnë në të njëjtën ligë.
Ky ndalim bazohet në vendime të marra që nga viti 2016, kur UEFA vendosi që Kosova nuk mund të luajë me Serbinë dhe Bosnjë-Hercegovinën për arsye sigurie, si dhe në vitin 2019 me Rusi. Në edicionin e parë të Ligës së Kombeve (2018/19), Kosova luajti në Ligën D, më pas në Ligën C për tri edicione.