UEFA ka miratuar një sistem të ri për eliminatoret e Euro 2028, duke shfuqizuar praktikën e deritanishme të kualifikimit automatik për vendet organizatore. Katër vendet pritëse, Anglia, Skocia, Uellsi dhe Republika e Irlandës, do të duhet të garojnë në fushatën kualifikuese për të siguruar pjesëmarrjen në turne.
Sipas formatit të ri, të 55 përfaqësueset evropiane do të ndahen në 12 grupe me nga katër ose pesë skuadra. Fituesit e grupeve dhe tetë kombëtaret më të mira të vendit të dytë do të sigurojnë kualifikimin, duke plotësuar 20 nga 24 vendet në dispozicion për fazën finale. Për të shmangur konfliktet e interesit, UEFA ka vendosur që vendet organizatore nuk mund të shortohen në të njëjtin grup eliminator.
Mekanizmi i sigurisë për organizatorët
UEFA ka parashikuar gjithashtu një mekanizëm sigurie për katër vendet pritëse. Nëse një ose më shumë organizatorë nuk arrijnë të kualifikohen përmes rrugës së zakonshme, dy nga vendet e mbetura për fazën finale do të rezervohen për ta. Në rast se tre ose katër organizatorë dështojnë në eliminatore, këto dy vende do t'u jepen atyre që kanë renditjen më të mirë.
Ky vendim ka nxitur debate, duke u krahasuar shpesh me qasjen e FIFA-s për Kupën e Botës 2030. Organizatorët kryesorë të atij turneu, Spanja, Portugalia dhe Maroku, e kanë siguruar pjesëmarrjen, ndërsa Argjentina, Uruguaji dhe Paraguaji e kanë marrë gjithashtu këtë të drejtë për shkak të organizimit të ndeshjeve hapëse në kuadër të 100-vjetorit, një vendim që ka shkaktuar polemika të mëdha mes tifozëve.
Ndeshjet e Euro 2028 në Angli do të zhvillohen në gjashtë stadiume: Wembley, Tottenham Hotspur Stadium, Etihad Stadium, stadiumin e ri të Evertonit, St James' Park dhe Villa Park.