Ukraina vendos sisteme për mbrojtje nga dronët rusë

Ushtria e Ukrainës ka filluar vendosjen në vijën e frontit të një pajisjeje të re mbrojtëse, të njohur si Chaharnyk (shkurre), e cila synon të kundërshtojë dronët rusë të kontrolluar përmes fibrave optikë. Ndryshe nga dronët që shfrytëzojnë sinjalet radio, këta dronë nuk mund të ndalen përmes sistemeve tradicionale të luftës elektronike. Kjo teknologji po tërheq vëmendjen ndërkombëtare, pasi mjete të ngjashme janë përdorur kohët e fundit edhe në konfliktin në Mianmar dhe në sulme kundër forcave izraelite. Pajisja, e zhvilluar nga kompania ukrainase Logika Design Bureau dhe e prezantuar zyrtarisht në shtator, funksionon si një gardh mbrojtës. Kur një sensor akustik dikton afrimin e një droni, sistemi aktivizon motorë elektrikë që lëvizin tela me grepa të mprehtë, të cilët ndërpresin fizikisht kabllon e kontrollit. James Patton Rogers, bashkëdrejtues i Future Threat Lab në Kolegjin Mbretëror të Londrës, e përshkruan këtë inovacion si “tela me gjemba inteligjentë”. Ndonëse kompania prodhuese pretendon një shkallë suksesi prej 95 për qind në këputjen e kabllove, sfidat mbeten të dukshme. Drejtuesit e kompanisë kanë sqaruar se droni mund të kalojë në një lidhje rezervë radio nëse kablloja pritet, duke kërkuar kështu përdorimin plotësues të sistemeve elektronike për rrëzimin përfundimtar të tyre. Gjithashtu, një raport kinez i vitit 2025 mbi teknologjitë kundër dronëve ka paralajmëruar se këto pengesa mund të anashkalohen nga pilotë të aftë, ose mund të shërbejnë si tregues për pozicionet e forcave mbrojtëse. Megjithatë, dhjetëra sisteme janë dërguar tashmë në vijën e frontit për t'u integruar si një shtresë shtesë mbrojtëse, duke u vlerësuar si e dobishme nëse vendoset rreth objekteve të rëndësishme ushtarake dhe zonave të banuara.