Kombëtarja e Uruguait është përballur me vështirësi të konsiderueshme logjistike gjatë udhëtimit të saj për në Shtetet e Bashkuara të Amerikës, në kuadër të përgatitjeve për Kupën e Botës 2026. Ekipi, i cili ishte akomoduar në resortin Mayakoba Complex në Cancun, u detyrua të shtyjë nisjen pasi avioni i planifikuar për transportin e delegacionit nuk kishte marrë autorizimin e nevojshëm për hyrjen në hapësirën ajrore amerikane.
Ndërsa raportimet e ndryshme kanë përmendur probleme administrative të dokumentacionit si shkak kryesor, disa burime theksojnë edhe një gabim organizativ nga ana e FIFA-s. Ky bllokim ka pasur pasoja të menjëhershme në axhendën e skuadrës, ku trajneri Marcelo Bielsa dhe kapiteni Jose María Giménez nuk arritën të marrin pjesë në konferencën zyrtare për shtyp në stadiumin Hard Rock.
Pas disa orësh pasigurie dhe negocimi midis palëve, Federata Uruguaiane e Futbollit konfirmoi se ishte siguruar një avion tjetër. Skuadra arriti të nisej nga Meksika drejt Floridës vonë gjatë së dielës. Uruguai bën pjesë në Grupin H dhe ndeshjen e parë e zhvillon kundër Arabisë Saudite.
Përditësime
Kompania ajrore ka kërkuar falje publike për incidentin që shkaktoi vonesën e delegacionit të Uruguait në Meksikë. FIFA konfirmoi se ngjarja erdhi si pasojë e një gabimi në lejet e fluturimit. Federata Uruguaiane e Futbollit shprehu pakënaqësi zyrtare, pasi skuadra mbërriti me më pak se 24 orë në dispozicion për ndeshjen. Si pasojë e vështirësive logjistike, kapiteni Jose Maria Gimenez dhe trajneri Marcelo Bielsa kritikuan ashpër menaxhimin e situatës në prag të Botërorit 2026.