Pjesëtari i Forcës së Sigurisë së Kosovës (FSK), OR3 Ismail Ahmeti, është renditur në vendin e dytë në "Garën për Luftëtarin më të Mirë" (Best Warrior Competition), të zhvilluar në Iowa të Shteteve të Bashkuara të Amerikës. Ai ishte pjesë e një grupi prej tre pjesëtarësh të FSK-së që morën pjesë në këtë garë me ftesë të Gardës Kombëtare të Ajovës, në kuadër të partneritetit ndërmjet dy palëve.
Gara, e cila zgjati katër ditë, kishte për qëllim testimin e aftësive ushtarake, përgatitjes fizike dhe mendore, si dhe qëndrueshmërisë së pjesëmarrësve përmes sfidave të ndryshme. Pjesëmarrja në këtë aktivitet vlerësohet si një mundësi për shkëmbimin e përvojave profesionale dhe thellimin e bashkëpunimit midis FSK-së dhe Gardës Kombëtare të Ajovës.