Rreth 480 viktima janë regjistruar në Holandë gjatë valës së pazakontë të të nxehtit që përfshiu vendin javën e kaluar, njoftuan autoritetet shëndetësore holandeze. Sipas të dhënave, vdekjet shtesë gjatë periudhës 22–28 qershor u shënuan kryesisht te personat 80 vjeç e sipër.
Zonat më të prekura nga temperaturat ekstreme ishin pjesët jugore dhe lindore të vendit, ku u shënuan temperatura rekord për muajin qershor, të cilat arritën deri në afro 40 gradë Celsius.
Ekspertët vlerësojnë se vala e të nxehtit, e cila nisi më 20 qershor, është një ndër më intensivet të regjistruara ndonjëherë në Evropë, duke rritur ndjeshëm rrezikun për shëndetin, veçanërisht për të moshuarit. Për shkak të këtyre kushteve atmosferike, edhe Franca ka raportuar të paktën 1 000 viktima, ndërsa autoritetet kanë paralajmëruar se bilanci përfundimtar mund të jetë edhe më i lartë.