Gjatë orëve të natës, shkolla 9-vjeçare “Selam Musai” në fshatin Babicë e Madhe të Vlorës është bërë shënjestër e një ndërhyrjeje të paligjshme. Persona ende të paidentifikuar kanë hyrë me forcë brenda ambienteve të godinës, duke shkaktuar dëme materiale.
Sipas të dhënave paraprake, dëmtimet janë konstatuar në dyert e shkollës, si dhe në materiale e pajisje të ndryshme shkollore. Deri në këtë fazë të hetimeve, nuk është konfirmuar nëse nga ambientet e shkollës janë vjedhur objekte me vlerë.
Shërbimet e Policisë kanë mbërritur në vendngjarje për të kryer këqyrjen dhe për të mbledhur provat e nevojshme. Grupi hetimor po vijon punën për zbardhjen e plotë të rrethanave të rastit, si dhe për identifikimin dhe kapjen e autorëve.