Sot në Lipjan mbahet ceremonia e varrimit të vogëlushit Zejn Zejnullahu, nxënës i klasës së katërt në shkollën “Zenel Hajdini” në Gadime të Epërme.
Ngjarja ndodhi të martën, kur vogëlushi nuk u kthye në shtëpi pas përfundimit të mësimit. Familja raportoi zhdukjen, çka çoi në nisjen e kërkimeve nga policia.
Dëshmitari Petrit Danqi, banor i Gadimes, e pa trupin e vogëlushit të dëmuar nga valët dhe e nxori duke kërkuar ndihmë nga fqinjët. Ai rrëfen se e ka kapur trupin, ka bërtitur me të madhe dhe fqinjët i kanë dhënë ndihmën e parë derisa mbërriti autoambulanca.
Vogëlushi u transportua në QKUK-Prishtinë, ku mjeku kujdestar e ka konstatuar vdekjen. Me vendim të prokurorit, trupi u dërgua në Institutin e Mjekësisë Ligjore për obduksion.
Policia e Kosovës ka nisur hetimet. Sipas raportit zyrtar: “Lidhur me rastin, pas pranimit të një informate se viktima mashkull kosovar nuk është kthyer në shtëpi, ka filluar kërkimi i tij me ç’rast nga dëshmitari mashkull kosovar i njëjti është gjetur në lum. Viktima me autoambulancë është transportuar në QKUK-Prishtinë, ku më pas ka ndërruar jetë. Vdekjen e viktimës e ka konstatuar mjeku kujdestar. Ndërsa në vendin e ngjarjes ka dalë njësia përkatëse, dhe me vendim të prokurorit trupi i pajetë dërgohet në IML për obduksion”.
Lajmin e konfirmoi gazetarja Endrita Bajrami e Klan Kosovës, e cila ishte pranë vendit të ngjarjes.