Gjykata Themelore e Prishtinës ka miratuar kërkesën e Prokurorisë Speciale të Republikës së Kosovës për vazhdimin e masës së paraburgimit ndaj të pandehurit Fatmir Sheholli. Vendimi u konfirmua nga zëdhënësja e kësaj gjykate, Mirlinda Gashi, e cila njoftoi se paraburgimi është zgjatur për një periudhë prej 2 muajsh, për shkak të dyshimeve të bazuara se i pandehuri ka kryer veprën penale të spiunazhit në vazhdimësi.
Fatmir Sheholli u arrestua nga autoritetet më 9 tetor 2025. Sipas dosjes së prokurorisë, ai dyshohet se ka qenë i rekrutuar nga shërbimi inteligjent serb (BIA) dhe ka vepruar nën udhëzimet e zyrtarit të lartë të këtij shërbimi, Bojan Dimiq. Hetimet ndaj tij kishin nisur që nga gushti i vitit 2024, periudhë gjatë së cilës i dyshuari ka qenë nën përgjim fizik.
Sipas hetimeve, Sheholli akuzohet për mbledhjen dhe shpërndarjen e informacionit mbi pronat, aktivitetet e biznesit dhe funksionimin e institucioneve të Kosovës, duke ofruar ndihmë për shërbimin e huaj. Gjatë operacionit të arrestimit dhe bastisjeve të kryera më 9 tetor 2025, Policia e Kosovës sekuestroi pajisje elektronike, dokumentacion dhe sende të tjera që shërbejnë si provë materiale në këtë çështje penale.