Analizat e ujit të pijshëm nga ujësjellësi i qytetit në Gostivar po vijojnë dhe do të intensifikohen edhe gjatë fundjavës. Sipas ministrit të Shëndetësisë, Sasho Klekovski, ndonëse uji mund të përdoret për qëllime të tjera teknike, ai mbetet i ndaluar për pije dhe për përgatitjen e ushqimit të freskët. Për heqjen e ndalesës nga Agjencia e Ushqimit dhe Veterinarisë (AUV), është e nevojshme që rezultatet e analizave nga të paktën nëntë pika të ndryshme të konsumit të jenë të përshtatshme për tri ditë radhazi.
Kryeministri Hristijan Mickoski bëri të ditur se pas procesit të klorizimit është evidentuar shfaqja e një bakterieje të re, çka ka ndikuar në zgjatjen e periudhës së kufizimeve. Në ndërkohë, qytetarët vazhdojnë të kërkojnë ndihmë mjekësore. Në Spitalin e Përgjithshëm “Ferid Murat” janë evidentuar 45 kontrolle të reja, prej të cilave 26 në repartin infektiv dhe 18 në atë të pediatrisë, ndërsa në Shtëpinë e Shëndetit janë regjistruar 28 kontrolle të tjera. Aktualisht, katër pacientë janë të hospitalizuar, përkatësisht nga dy në repartin infektiv dhe atë të pediatrisë.
Kriza e ujit në Gostivar filloi më 17 korrik, kur AUV vendosi ndalesën për përdorim, pasi inspektorët në bashkëpunim me policinë zbuluan një pompë që fuste ujëra të ndotura në sistemin e ujësjellësit. Si pasojë e hetimeve, autoritetet kanë arrestuar drejtoreshën e ndërmarrjes “Komunalec” dhe dy punonjës të tjerë.
Organizata CIVIL dhe CIVILI i Gjelbër u kanë bërë thirrje aktorëve politikë që të ndërpresin akuzat e ndërsjella dhe të përqendrohen te zgjidhja e krizës, duke theksuar se ndërprerja e furnizimit me ujë të sigurt përbën shkelje të të drejtave të njeriut. Ata gjithashtu ngritën shqetësimin se rreziqe të ngjashme përballen edhe banorët e komunave të tjera si Krushevë, Vallandovë, Pllasnicë dhe Pregllovë.
Përditësime
Autoritetet shëndetësore raportojnë përmirësim të situatës epidemiologjike në Gostivar, pas rënies së numrit të pacientëve. Që nga fillimi i krizës, janë kryer gjithsej 4.483 kontrolle shëndetësore, ndërsa institucionet kanë përpunuar 1.014 raportime për sëmundje infektive dhe 706 anketa të reja. Hetimet konfirmuan se kontaminimi i sistemit të ujësjellësit ndodhi më 25 qershor, si pasojë e vendosjes së pompave zhytëse në kanalin me ujë të ndotur gjatë testimit të presionit. Monitorimi i ujit për pije vazhdon të jetë aktiv.
Shtabi Kryesor për Menaxhimin e Krizave hoqi zyrtarisht ndalesën për përdorimin e ujit në Gostivar. Shefi i Shtabit, Stojançe Angellov, konfirmoi se analizat laboratorike dëshmuan sigurinë mikrobiologjike dhe bakteriologjike të ujit pas gati një muaji monitorimi. Qytetarët tani mund ta përdorin ujin e rrjetit për pije dhe nevoja të tjera të përditshme.