Trupi gjykues pranë Dhomave të Specializuara në Hagë ka vendosur të zgjasë masën e paraburgimit për Kadri Veselin dhe Jakup Krasniqin edhe për 2 muaj. Lajmi është konfirmuar nga gazetarja Rina Mujku, e cila raportoi se vendimi është marrë për shkak të skadimit të afateve procedurale, pasi vendimi i mëparshëm datonte më 15 korrik 2026.
Ndonëse bëhet fjalë për një veprim të karakterit procedural, është vënë në dukje se ky vendim u ndërmor vetëm një ditë përpara shpalljes së verdiktit përfundimtar për katër ish-krerët e UÇK-së: Hashim Thaçin, Kadri Veselin, Rexhep Selimin dhe Jakup Krasniqin. Për sa i përket Hashim Thaçit, në një vendim të mëparshëm të datës 10 gusht, gjykata kishte urdhëruar ndërprerjen e parashtresave për rishikimin e paraburgimit, duke pasur parasysh datën e shpalljes së aktgjykimit. Ndërkaq, për Rexhep Selimin, paraburgimi ishte vazhduar në fund të korrikut, me një rishikim të parashikuar në parim për datën 28 shtator 2026.
Media të ndryshme kanë raportuar se nuk ka afate të tjera të njohura për marrjen e vendimeve të ngjashme për Hashim Thaçin dhe Rexhep Selimin, ndërsa aktgjykimi për të gjithë të akuzuarit pritet të shpallet zyrtarisht më 16 shtator 2026.